اليوم ... الثلاثاء 1 فبراير
الشهر ... فبراير
السنة ... 2010
الساعة ... 6:38 صباحا
موعدى مع أول تدوينة ليا .. يمكن كنت بحضرلها من ييجى سنة كده ولا حاجة بس كل ما اجى اعمل المدونة احتااااااااار :(
ياترى هاسميها ايه ؟؟ وكل ما اختارلها اسم ألاقى حد عامله
لحد النهارده بعد ليلة طويلة مليئة بالأحداث والمتاعب المعتادة كأى ليلة فى الاجازة .. قررت وأخيرا انى اعمل مدونة حالا وبدون اى تفكير وقولت زى ما تيجى تيجى
يمكن الدافع انى قررت ولأول مرة انى أطلق العنان والحرية لروحى أخيرا .. اسيبها تتصرف على طبيعتها من غير اى قيود او مثبطات ومن غير رقابة
بالرغم من الظروف الصعبة اللى بمر بيها دلوقتى واللى لا يعلم بيها الا الله ثم أقرب المقربين ليا الا انى متفائلة وحاسة ان بكرة هيكون احسن
وانى لازم احلم بان بكرة هيبقى اجمل .. يمكن مش عشانى .. ويمكن برده مش عشان أهلى دول احسن ناس فى الدنيا .. بس الأكيد ان القلب النقى اللى عمره ما كره حد ولا أذى حد عن قصد الأكيييييد ان ربنا عمره ما هيضيمه
و فى الاخر
بحبك اوى يارب
شكرا يارب على دعمك ليا ووقوفك جنبى فى أزمتى وكفاية عليا انك راضى عنى
شكرا يارب على انك باعتلى احسن واوفى اصحاب واخوات فيك فى الدنيا كلها
شكرا يارب على انك دايما موجود فى بيتنا وحاميه وحافظه ودايما لما بنزعل من بعض بنفتكرك فبنرجع نحب بعض تانى
شكرا يارب على انك صابر عليا وعلى جزعى من قضائك بس انا والله راضية يمكن بدلع شوية عشان عارفة انك برده كاتبلى الخير
وفى الاخر برده
بحبك يارب
اللهم اقدرلى الخير حيث كان وارضنى به يا أرحم الراحمين
